Avec un mêm' cerveau, un mêm' sang, un mêm' coeur,
Vous avez bâti l'Homme in vous r'vettiant dins l' glace.
Fait's qué tous les humains euch'nt el piau d' mêm' couleur
Pou qu'in voch' s'in daller les hain's inter les races.
Et n' fait's vénir au mont' qué des infants d' la Paix
Sans esprit conquérant et sans idées guerrières
Pou qu'y-euch' moins d' morts qu'à ch't-heure et moins d'handicapés.
Si j' croyos au Bon Dieu, ch'est c' qué j' f'ros comm' prière!

Vous qui-avez fait prêcher l'Amour et l' Dignité,
Fait's qué l' pauf' soch' moins paufe et l' rich' beaucop moins riche, Qu'in puch' fair' disparaît' les inégalités
Intre l' cheu qui-off' ses bras et s'n exploiteur qui triche.
Et pou li fair' gagner s' pain à l' sueur dé s' front,
Fait's qu'i-euche au moins d' l'ouvrach' su not' planète intière
Pou l' brafe ouverrier qui, du chômache, a l'affront:
Si j' croyos au Bon Dieu, ch'est c' qué j' f'ros comm' prière!

Vous qui véyez su tierr' tant d' ménach's désunis
Avec souvint l'Infant, premièr' victim' du drame,
Créez d' l'amour durap' quand deux jonn's font leu nid
Si ch'est vrai qu' vous lisez dins les coeurs et les âmes.
Et si vous avez l' temps d' vous pencher sur ém' sort,
Faits-mé connaître el joie dé m'vir arrièr'-grand-père
Et d' vife assez longtemps pour fiêter mes noc's d'or:
Si j' croyos au Bon Dieu, ch'est c' qué j' f'ros comm' prière !

Quand l' grante horloch' sonn'ra qu' ch'est v'nu mn heure ed morir, Fait's qué m' feimm' soch' cor là pou frinmer mes paupières
Et, quand arriv'ra s' tour, qu'ell' m'arjoign' sans souffrir:
Si j' croyos au Bon Dieu, ch'est c' qué j' f'ros comm' prière !