|
COMME T'ETOS BELLE, M'MAN
J'ai trouvé dins l' guernier,
in format cart' postale,
Protégée des poussièr's dins ein' pochette ed toile,
Ein' photo qui n'a pas été rongée pau temps,
Ch'est un groupe ed jonn's fill's, un soldat au mitan.
Et quand j' té l' l'ai moutrée, t'as mis t' tiête in
arrière,
T'as dit: « Chà m' rajeunit, ch'est mi pindant la guerre!
» (1)
Mi, j' t'ai r'connue tout d' suite à tes grands yeux luisants.
Mon Dieu, comm' t'étos bell', m'man, quand t'avos treize ans !
Alors, té m'as appris qu' chà s' passot dins l' bos d' Raismes,
Qué t' faisos un ouvrache assez dur pou des feimmes:
Ebranqu'ter des grands arp's abattus par milliers,
Sous l'oeul ed sentinell's, par des Russ's, prisonniers,
Obligés d' transformer - maudit's raisons guerrières -
Des hectar's ed forêt in misérap's clarières.
Mais pindant qu' tes pauf's dogts maniott'nt l'hache in s'usant,
Mon Dieu, comm' t'étos bell', m'man, quand t'avos treize ans!
Ah! T'es cor' belle, ét' sais : j' vos d'jà t' nez qui s'arsaque
! Mais là, su l' cart' postal', t'as fait un vrai miraque.
Raviss' les ch'veux des aut's : un mouchoir les artient.
Et toi, té l' l'as inl'vé, t'as l'air d'un prince indien.
Pourtant t'es mal loqu'tée comme ein' romanichelle:
Un tabier in vieux sac, loïé par ein' fichelle !
Mais au-d'ssus d' tes viell's fouff's, i-a t' sourir' séduisant:
Mon Dieu, comm' t'étos bell', m'man, quand t'avos treize ans!
L' photo, j' vas l'agrandir. J'y vas tout d' suit', jé l'jure,
Pas tout, in t' verrot moins. Rien qu' toi, rien qué t' figure.
Et quand jé l' ravis'rai, j' sourirai in disant:
Mon Dieu, comm' t'étos bell', m'man, quand t'avos treize ans!
24 octobre 1981
(1) Celle de 1914-1918 !
¥º¥º¥º¥
|
|
|