L'APPRINTI SERRURIER
T'as réussi t'n essai, garchon,
j' té félicite.
J'ai b'soin d'un apprinti, té m' plais, j' t'imbauch' tout d' suite.
Les aut's qui, tout comm' ti, i-ont passé l'examen,
Avott'nt aussi l' manière et, comme in dit, "la main",
Mais i z-avott'nt surtout un détal qui m'agace:
J'ai horreur des jonn's gins qui port'nt ein' lonqu' tignasse.
Mi, j' sus certain qué d' ti j' frai un vrai serrurier.
Comme ej t'ai vu ouvrer, t' s'ras un bon ouverrier.
Malgré qué t' n'as pas eu t' Certificat d'étutes,
T'es dé l' graine ed champion, crois-mé, j'ai l'habitute.
T'as ein' coiffur' correct', t'as l' serrur'rie dins l' sang.
J' sus bin contint dé m' choix et, soit dit in passant,
Grâce à mi, dins six mos, té s'ras un spécialiste
Qui n' trouv'ra pus jamais ein' serrur' qui résiste.
J' d'aros pris un deuxièm', qué j'aros mis dins l' coup,
Si n' d'avot eu un aut' sans longs chéveux dins s' cou.
Bon, t'aras dix francs d' l'heur', quarante heur's par sémaine.
Est-c' qué chà va t' conv'nir, té m'as là l'air
tout d'eine ?
- Si j' sus tout d'ein', Monsieur, ch'est tell'mint qu' vous m' flattez
Ej s'ros vraimint heureux si j' pouvos l' mériter.
Vous dit's qué j' travall' bin : jé l' dos sûr'mint
à m' père
Qui, d' mes dogts, jour et nuit, m'a appris à tout faire.
Vous m' trouvez ein' bell' tiêt', faut qu' j'in disse el raison:
J'ai toudis les ch'veux courts, quand ej sorte ed prison! »