ATTENTAT AU PRESBYTERE
C' n'histoir' vraie-chi s' passe
avant-guerre,
Ch'est m' bell'-mèr' qu'é m' l'a raconté'.
Cheux qui l' l'ont vi sont au cim'tière,
Si bin qué j' peux vous l' répéter:
L' servant' du vicair' d'un vilache,
A l' bouch'rie, dins tous ses états,
Clamot qué s' maîte - ah! queu dallache ! -
V'not d' récaper d'un attentat:
« Vers deux-tros heur's, el nuit dernière;
Un inconnu, sans dout' quervé,
A j'té dins l' fernièt' du vicaire,
Fèl' comm' l'obus, un gros pavé!
L' cop i-a fait un grand bruit d' tonnerre
- J'in su cor' tout effarouché -
Epillant in mille éclats d' verre
Un carreau dé l' champe à coucher!
L' grès a rif'té sur el couchette,
Arrachant couverture et drap
Mais, pour ein' fos - miraqu' peut-ête -
Monsieur l' vicair' n'y dormot pas! »
Not' boucher ch' tot un pinc'-sans-rire,
Toudis ein' broque à mette au tro,
L'air innochint, i s' met à dire
Pindant qué l' braf' femm' soupirot:
« Heureus'mint qué l' lit i-étot vite!
Pour l'abbé, me v'là rassuré.
Mais... in plein' nuit, dits-mé tout d' suite:
Aduss qu'i-étot couché, l' curé ?
A m'n avis - qué l' Bon Dieu m' pardonne -
Si c' caillou-là, si bin lancé;
Etot kéu dins l' lit dé l' bonne,
J' parie qu'i-arot eu deux blessés! »