Vous savez bin tertous gué, dpus l'année dernière, J' sus grand-père! Ouais, mais Sally, m' braf'tchien, i n' trouf' pas chà à s' goût: I-est jaloux! I n' fait, quand in est là, chà vous pouvez m'in croire, Pas d'histoire, Mais, croyant qu'in n' l'aim' pus, quand i s'artrouf' tout seu, I dvient seut ! Et pourtant jé l' l'aim' bin, tout comme ém' pétit' fille, Si gentile. Elle est jeune, i s' fait vieux, mais i d'vient infernal, L'animal !

UN TCHIEN INFERNAL

« Bin alors, ém' pépett', quoi-c' qu'i-a là, té t' fais vieux ?
T'as t' queue inter tes patt's, té m'as l'air tout péteux.
A cor' fait des pipiss's su l' tapis dé s' mémère ?
A pas peur d'êt' piqué par el vétérinaire ?
Té sais bin qu'à mes yeux t'es l' meilleu d' tous les tchiens,
Mais avoue qu' pou t' maîtress' té n'y mets pas du tien !
Qu'mint veux-tu, m' tiot' biquette, qu' enn' soit pas in colère
Quand t'i vol's és rôti, comme el sémain' dernière ?
Quand t' fais t' crott' su l' moquette et qu'ell' dérape eddins ?
Quand t' mont's su l' lavabo et gué t' croqu's mes fauss's dints ?
Allez, n' mé raviss' pas avec tes yeux tout trisses,
Mi, jé n' té bats jamais mais ti, t'attrap's des vices.
Té sais qu' tes fantaisies comminch'nt à coûter cher ?
L' fond d' patalon d' toil' bleu qu' t'as dévoré hier
N' nous â pas fait r'gretter d'avoir eine assurance:
In n' d'a eu pou cent francs, l' prix d' vingt-cinq lit's d'essence.
Mais chà, ch'est core errien : pou m' nouviau ratelier
J'ai dû payer mill' francs au dentiss' du quartier.
Malgré tout, té l' sais bin, i faut gué j' té définche,
Mais ti, fais un effort, ravisse éc' gué té minches !
Té n' vas quand mêm' pas m' dir' gué t'as trouvé chà bon,
Les couch's dé m' pétit'-fill', les coussins du salon ?
Les arêt's ed sauret qu' t'as trouvées dins l' poubelle
Qué t'avos culbutée su l' bassine à vaisselle ?
L' cahier d' « recommandés » qu' t'avos pris au facteur
Qui-a attrapé ein' droull', tell'mint gué t'i-as fait peur ?
Et l'aut' jour, à midi, not' plombier, t'as vu s' tiête
Quand t'avalos l' briquet qu' t'avos pris dins s' musette?
Mais li s'a rattrapé su l' chou-fleur gratiné
Et l' côt'lett' qu'in m'avot préparée pou m' dîner !
Eh, n' bafiell' pas comm' chà ! Chà attaque el carr'lache.
Raviss' chà ! Comm' chà guille ! ét' n'aros pas la rache ?
Ouais, jé l' vos, té prinds d' l'âch', t'as onze ans bin sonnés.
Tiens, avale un chuchuqu' ... mais arrête ed picher !
Core heureux gué c' cop-chi té l' l'as fait dins l' cuisine,
J' vas l' nettoyer tout d' suit' pou qu' chà n' sinch' pas l'urine.
Tiens, v'là core un chuchuqu'. Fais sissit' dins l' fauteul.
Laisse el nounours tranquille: i n'a pus foque un oeul !
Et fais semblant d' dormir, v'là t' maîtress' qui s' révelle.
J' veux qu'elle artrouf' chi tout, comm' tout i-étot la velle.
Un bon p'tit cop d' wassingue et ... camouflons l' mouchoir
Qué t'as eu l' bonne idée d'arracher hier soir.
V'là t' mémèr' qui déquind ... mais qu'est-c' gué t'as dins t' gueule ?
Allez ... donne à s' pépère ... eh, n' minch' pas m' portefeulle ! »

¥º¥º¥º¥