A ma petite fille
                            Virginie, Eva Ville née
                            le 25 octobre 1980 à
                            Valenciennes.






Grand-pèr', grand-mèr', queune allégresse!
Not' garchon vient d' téléphoner,
S' voix inrouée mais plein d'tendresse:
Not' premier p'tit-infant i-est né !
In s'a j'té dins les bras l'un d' l'aute
Et d' nos yeux des larm's ont coulé,
Des larm's ed joie, des làrm's tout's cautes,
Su l' cop, in n' savot pus parler.
Allez, Marilou *, in voiture!
Filons jusqu'à l' Maternité.
Edpus l' temps qu' note attinte ell' dure
In va pouvoir l'amicloter !
Ein' pétit' fill' ! Qu'ell' dot êt' belle !
Ein' Virginie, queu biau prénom!
L'un après l'aute, in s'approch' d'elle,
Not' gorch' pochée pa l'émotion.
Et quand, su s' pétit lit, jé m' penche,
J'oblie tout c' qui s' passe alintour:
Dins s' maillot, in dirot un anche
Qué s' mèr' ravisse avec amour.
Elle a d'jà des ch'veux, not' canette!
Des ch'veux châtains, qu'i sont-i biaux !
In n' sarot pas dir' qu'ell' vient d' naîte:
Ell' n'a pas ein' seul' rit' su s' piau.
Elle ouf' ses yeux, mon Dieu, ma mère!
Bleu marine, in n' peut pus vivants,
Des yeux arflétant les leumières
Et qu'un rien d' sourcils rind pus grands.
Si vous véyott's ses fin's orelles,
Régulièr's comm' cheull's d'un p'tit Dieu,
Parell's au restant, ch't ein' mervelle
Qu'un sculpteur n'arot pas fait mieux.
Et s' nez, qu'elle a presqu'in trompette, Proportionné just' comm' i faut,
D' n'import' queu côté qu'in l' ravette
In n'y trouf' pas un seul défaut.
S' bouch' cha dot êt' l'oeuv' d'un artisse
Qui-a mis tout s'n âm' pou l' dessiner
Avec des lèf's rouch's comm' des c'risses
Arsortant su s' teint satiné.
Quand in prind s' main, douch' comme ein' pêche,
Ell' sait d'jà vous ténir un dogt.
C' gest' câlin-là, tout comme ein' flèche,
Vous travers' d'un frisson dins l' dos !
Elle est fort', not' pétit' biquette,
Morciau d' not' chair, goutte ed not' sang:
Ell' mésur' cinquant' centimètes
Pour un poids d' trois kilos neuf cents.

Vous allez dir' qué j'exagère
Et, rinfanti par el bonheur,
Qué j'ai l'oeul ed tous les grands-pères
Qui vott'nt tout biau quand ch'est les leurs.
N' pinsez surtout pas qué j' radote.
D' tout c' qué j' dis-chi, j' n'invinte errien.
Des biaux p'tits-infants, y-in a d's autes,
Mais mi, ch'est l' premier... et ch'est l' mien!


* Ch'est m' feimme !

¥º¥º¥º¥