« Ouais, sans m' vanter, m' garchon ch'est l' pus malin dé s' classe.
I vous récit' par coeur tous les lif's dé s' carnasse.
I connot tout d' l'Histoir', du Déluche à nos jours,
L' Français, l' Géographie, i-est vraimint doué pour.
Ch'est l' roi des Maths modern's - ej cros bin qu'i m'arsempe -
Heureux qu'i-a ein' gross' tiêt', sans cha, s' cerveau i campe!
I paraît qu' ses copains sont pleins d'admiration
Quand l' maîte i l' fait sé l'ver pour ein' récitation!
J'ajout' qu'i n'a pus rien à apprint' dins les sciences
- I tient dé s' père et s' mèr', côté intelligence -
Et cha li rint' tout seu, ch' n'est pas qu'i ouèf' beaucop.
Bref, i-est toudis premier ou premier ex-aequo !
Qu'est-c' qué vous in pinsez, i-a quatorze ans à peine ?
Mi, j' sus fièr' d'ête el mèr' d'un parel phénomène! »

Ainsi, rait' comme un paon, ein' voisine ed gardin
Qui-avot l' réputation d'un grand cul sans rien d'dins,
Parlot à Zéphyrin, l' croyant d'humeur jalousse.
Mais l'aute i li répond, d' l'ironie plein s' frimousse:

« Jé n' veux pas vous vexer, mais m' garchon i-est pus fort!
I-a toudis t'nu dé s' pèr' l'amour des grands efforts.
Pourtant i n'a qu' douze ans, mais ch't' un puits d' connaissance
Et i n'a sûr'mint pas s' parel dins tout' la France.
D'ailleurs, i pourrot d'jà s' faire ein' situation;
Seul'mint, faut qu'i-aile in class' pou les allocations.
Mais i travalle ed trop, pour un gamin dé s'n âche,
Tous les jours i rint' tard, i va s' tuer à l'ouvrache !
I-est tell'mint courageux qu' bénévol'mint, d' bon coeur,
I donn' des cours du soir à tous ses professeurs ! »