Neiche et glache de m'jonne temps

A mes camarades d'enfance

.NEICHE ET GLACHE DE M' JONNE TEMPS

I neiche à gros flocons et m'n esprit i s'invole
Vers Bruille, vers em' passé, vers em' pétite école,
L'hiver trent' neuf-quarant', des centain's ed troupiers
Dins des souillers à clos qui-ingélott'nt-té leus pieds.
J'nous r'vos débirouler in chabots, in galoches,
Sans s' soucier dé l' montée du bruit des bott's des Boches
Qui-allott'nt surgir in mai nous voler cinq printemps *.
Pourtant, comm' ch'étot biau, l' neiche et l' glach' dé m' jonn' temps !

Rout's et fossés sans drains étott'nt nos patinoires.
A ch't-heur', pour in trouver, cha fait toute eine histoire!
Dins l' fil d'iau, bin souvint, i n'y-a pus d' glach' du tout:
Bainoir's, lessif's, vaissell's vont dins l' tout-à-l'égout.
Et mêm' si n'y-in avot, l's infants n' d'arott'nt ein' bonne:
Y-a tous les trois-quat' dogts, eine auto qui stationne!
Nous-aut's, mêm' des vélos, i n' d'avot pas autant,
Pourtant, comm' ch'étot biau, l' neiche et l' glach' dé m' jonn' temps !

Not terrain d' jeux ch'étot tous les camps, tout l' villache.
Y-a qu'aux vaqu's et aux qu'vaux qu'in d'vot laisser l' passache.
Ah! les bonhomm's ed neich', sentinell's des quartiers,
Les bourlots qu'in s' lançot pindant des jours intiers !
Aujourd'hui in n' l'aim' pus, l' neich' gên' presqué tout l' monte. Quand enn n' fond pas tout d' suite, y-a du sel pou l' fair' fonte. Cha fait marcher les gins d'un pas moins hésitant.
Pourtant, comm' ch'étot biau, l' neiche et l' glach' dé m' jonn' temps !

I neiche à gros flocons mais i vont disparaîte:
L' camion-sableur i pass' juste au d'vant dé m' ferniète.
Not rue va s' dégager, cha n' glich'ra pus si tant.
Pourtant, comm' ch'étot biau, l' neiche et l' glach' dé m' jonn' temps !

* L'invasion allemande commença le 10 mai 1940. Notre arrondissement ne devait être libéré qu'au début du mois de septembre 1944.

¥º¥º¥º¥