Pindant qu' dins vos salons vos grands sapins s'alleument
Dins l' ciel gris d'USINOR, pas ein' quéménée n' feume
Pindant qu' vous festoyez, vous êt's sourds à l'appel
Des p'tits infants du Nord, croyant au Pèr' Noël
Et qui-ont eu comm' cadeau, décision inhumaine,
L'annonce à leus papas d'ein' mise à l' cour prochaine.
Et pourtant, vot' fortun' - l'avez-vous oblié ? -
Ch'est l' traval, el sueur et l' sang des ouverriers !

Par dizain's ed milliers, à D'nain, à Valinciennes,
Des gins i-ont défilé pour exprimer leus peines
Et pou manifester leu volonté d'action
Cont' vos projets qui f'rott'nt un désert dé l' région.
Travailleurs in toil's bleus, in blous's ou in cravates
Dévienn'nt, face au danger, d' pus in pus camarates.
Pindant qu' vos dogts rapac's souillott'nt les bénitiers
Mêm' les curés suivott'nt les band'rol's déployées *.

Profitez-in, barons, tant qu' l'union n'est pas mûre,
Bradez l' carbon du Nord, s'n acier, ses filatures !
Profitez-in, barons, les infants d'USINOR
N'ont pus d' joyeux Noël. Mais tous les gars du Nord,
A forche ed vous r'bâcher qu'i-a trop longtemps qu' cha dure,
A forche ed vous cracher leu mépris à l' figure,
A forche ed vous prêcher: « Traitez-nous in humains ! »
Vous r'prindront les Noëls qué vous t'nez dins vos mains !


* Mêm' qu'in a vu l' curé et l' maire
Défilant dins l' rue du Quesnoy
Et portant insemp', l'allur' fière,
El band'rol' DEFENS' DE L'EMPLOI.

¥º¥º¥º¥