L'automn' nous a kéu comme ein' buqu' dins ein oeule.
Em' pronier a perdu d'pus dé l' moitié d' ses feulles.
Sur ein' nuit l' vint du Nord est v'nu déshabiller
Mes deux-trois p'tits arbust's et mes trois-quat' rosiers.
Au milieu dé m' gardin, l'ange in simili-pierre
A l'air ed s'écrouler in d'ssous dé s' pot plein d' lierre.
A pierch' sur ein' roue d' car, s' tiêt' rintassée dins s' cou,
Ein' poul' blanqu' nous raviss' comme el f 'rot un hibou.

M' biau-garchon l'a gagnée l' cop passé à l' ducasse
Et m'a dit: « Gardez-l'lé, que voulez-vous qu' j'in fasse ? »
J'ai mis l' poul' dins ein' caiss', j' l'ai abritée dins m' cour
Avec l'idée dé l' tuer dins ein' trentaine ed jours.
Faut-i croir' qu'elle avot 'té él'vée à l' pourrette ?
Elle arfusot s' gamell', quoi qu'in ait pu li mette.
Alors, matin et soir, ch'est mi qui li-ouvrot s' biec
Et m' femm' l'ingavot d' blé et pis d' maïs avec !

D'ête ainsi dorlotée, elle a pris tout's ses aisses,
Ell' queurt au cul dé m' cat qui s' saufe à tout' vitesse.
Par conte, elle aim' bin m' tchien, ell' li laisse ingloutir
Les fonds d' terrine ed lait qu'ell' n'a pas su finir.
Ell' nous sieut tout partout. T'nez, si jé l' laissos faire,
Elle irot à l' cuisine, à l' cafe, au frigidaire!
Bref, dé l' vir dins nos gamp's, in est habitué
Et personn', dins l' famill', n'a l' courach' dé l' tuer !

Allez savoir pourquoi qu'in s'attache à ein' biête
Qui met s' crott' tout partout, nous coût' les yeux dé l' tiête ? Pasqué pou l'appétit, elle a toudis d' l'intrain:
J'ai 'té, pou l' vingtièm' fos, li querre un sac ed grains !
In puss, enn' fait pas d'ués, à moins qu'enn' nous les muche.
Ouais, un d' ces quat' matins, i faudra bin qu'in l' tuche.
Mais à forche ed toudis armett' cha pou l' lind'main,
Vous verrez qu' ch'est l' poul' blanqu' qui suivra m'n interr'mint !

¥º¥º¥º¥