A ma bru Krystyna
BONJOUR, ESPOIR !
Mes amis, tindez vos orelles:
Ell' va s'in raller, l'hirondelle*
Qui, au printemps, m'a dit pourquoi
Enn' pouvot pus vif' sous nos toits.
A pierch' sur un fil électrique,
Ell' mé lanc' des cops d'oeul obliques
Et, à s'façon dé m'raviser,
J'comprinds qu'ell' veut cor déviser.
Pindant qu'un noeud vient gonfler m'gorche,
V'là qu'ell' mé gazoulle avec forche:
J'ai pu juger l'situation,
Ami: j'arviens su m'décision!
Bin sûr, i-a d'trop d'automobiles,
Mais, dins les camps, ch'est bin facile
D'aller fair' mes évolutions
Pour éviter l'circulation.
Et, malgré les insecticites,
J'rattrap' des mouqu's - oh, tout's pétites-
Mes pris's i m'faut les répéter,
Comm' cha, j'arrife à m'continter.
J'peux aller boir' dins la Rhonelle,
Rivièr' qui r'dévient naturelle
Grâce aux bassins d'épuration
Qui-ont éliminé l'pollution.
Aussi, mé v'là fin optimiste
Et m'coeur est d'pus in pus Nordiste.
Vous êt's des gins hospitaliers
Qui-aim'nt-té bin nous vir par milliers.
Tous l's ans, l'génération nouvelle
Artrouf' toudis, in-d'ssous d'ses ailes,
Sous les nochèr's des gars du Nord,
L'nid laissé par les parints morts.
Ouais, ch'est les ch'ti-mis qué j'préfère,
J'vos s'améliorer l'atmosphère.
Aussi, continue tes efforts,
L'année qui vient, j'arverrai cor! »
Alors, ell' sé pos' su m'n'épaule,
Ses yeux luisant d'ein' gaîté folle.
Jé m'sins tell'mint heureux avec
Qué j'li fais ein' gross' baiss' su s'biec !
Mais v'là-t-i pas qué j' mé révelle !
J'ai rêvé: l'histoir' 'tot trop belle!
Non, ch' n'est pas du jour au lind'main
Qu'in bonifie l'invironn'mint.
J'mé lièf', j'passe em' nez à l'ferniête.
Dins l'ciel plan'nt ein' vingtaine ed
biêtes, Pétits osiaux, tout blanc et noir...
Tiens... pourquoi pas? BONJOUR, ESPOIR !
* Ch'est
l'hirondelle dé l'page 7
¥º¥º¥º¥