L' MARCHAND D' PIAUX D' LAPINS

J'intinds: « Peaux d' lapins, peaux! » cor' sonner à m'n orelle,
Ch'est l'cri du vieux marchand qui f'sot s' ronte à vélo
A peu près tous les s'main's, dins les rues et ruelles,
In soufflant dins ein' corn' immanchée d'un chifflot.

Tous les maisons, avant et même après la guerre,
Disposott'nt d'ein' garenne et d'un p'tit poulailler.
In n'gagnot pas beaucop, la vie étot bin chère,
Chacun, grâce à l'él'vache, i dévot s' débrouiller.

Les quinzain's ed pêqueux n' permettott'nt-té dé l' viante
Qu'ein seul' fos par sémain', souvint pour un bouillon.
El récolt' du gardin, grâce à m' père, abondante,
Nous régalot, l' diminch', comme un vrai Réveillon.

Alors ed timps in temps, pou corser l'ordinaire,
A tuer un lapin i fallot s' résigner.
El piau, bin artournée, bourrée d' palle ou d' fertières,
Etot mise à séquer, suspindue, au guernier.

Quand l' marchand d' piaux d' lapins, annoncé pa s' trompette,
S'amnot, l' figur' tannée des vints d' tous horizons,
Ej m'incouros vers li in l'vant au-d'ssus dé m' tiête
El dépoulle arséquée, comm' si ch' tot un lampion.

Après l' l'avoir tâtée, i l'mettot bin in plache
Su les deux grands moncheaux qu'i-avot d'jà récoltés
Et qui f'sott'nt deux montan's su ses deux port'-bagaches,
A tel point qu' pou conduire, i-avot s' tiêt' su l' côté!

Ah ! L' momint du paiemint ! Ah! L' momint dé l' dringuelle !
C' diap'-là trouvot toudis qué l' poil, mauvais, s' perdot,
Qué l' piau n'étot pas belle au bin qu'ell' 'tot trop vielle,
Infin, qu'in mé l' perdant, i m' faisot un cadeau!

Alors, du creu dé s' main, i saquot deux, trois pièches
- Oh, ch' n'étot pas des francs, ch'étot ein' paire ed sous ! -
Et i m' les armettot avant qu' jé n' mé dépêche
D' les porter à m' manman, un p'tit sourire « in-d'ssous ».

Braf' manman... j' t'arvos cor', tes deux mains su tes hanches,
M' raviser v'nir avec tes yeux tout pleins d'amour
Et m' dire: « Allez, m' garchon, gart'-les, cha s'ra t' dimanche! » Ouais, marchand d' piaux d' lapins, té m' rappell's des bons jours!

¥º¥º¥º¥