UN BON PLACH'MINT

Mardi soir, à Marly, assis "Café dé l' Plache",
Zéphyrin discutot avec animation
Avec deux compagnons, deux camarat's d'ouvrache.
Trois cents millions d' francs f'sott'nt l'objet dé l' discussion.

« Mi, j' pins' bin, disot l'un, qu'i faut grouper nos doupes
Et fonder, à nous trois, ein' nouvell' société.

- Ah, non, répondot l'aut', mi, jé n' veux pas qu'in s' groupe, Chacun prind cent millions et s' débroull' dé s' côté!

- A moins, dit Zéphyrin, qu'in pourrot jeuer in Bourse
Et placher note argint in acatant d's actions ?
I n' faut pas s'énerver, in n' fait pas chi ein' course,
Trois cents millions, quand mêm', chà mérit' réflexion! »

Or, à l' tap' d'à côté, derchant tiête et orelles
Pou comprint' leus parol's, i-avot là un p'tit vieux
Qui, alors qué nos zouaf's discutott'nt ed pus belle,
L's interromp in disant:
                        « Vous permettez, Messieurs ?
J' m'excus', mais j' m'aperçois que vous êtes en peine
Et que vous ignorez ce qu'est un bon plac'ment.
J' suis ancien agent d' banque et si c'là ne vous gêne,
Je puis vous tuyauter sans aucun engagement. »

Les trois compèr's s'artourn't su l' bonhomm' respectape
Avec les yeux d'ein' vaqu' ravisant passer l' train,
Pis is éclat'nt d'un rire à ramoner tout l' tape:

« In n'a pas b'soin d' consels, Monsieur, dit Zéphyrin.
In a misé à trois, intre l' poire et l' fromache,
Sept francs, sept numéros : avouez qu' ch'est pou rien.
Et, pou nous amuser, in discut' du partache
Du gros lot du "Loto" qu'in espèr' gagner d'main! »