|
|
A l'équipe de Marly
des boueux de la
S.E.R.T.I.R.U. toujours
souriants
malgré leur pénible métier.
LES INCOMBRANTS
Chu qu' ch'est qu' les encombrants,
tout Marly vous l' dira,
Ch'est tout c' qu'in n' peut pas mette aux ordur's ménagères:
Vieux fauteuls, viellés loqu's, vieux feux et coetera
(J'in connos qui mettrott'nt volontiers leu bell'-mère ! ).
Ch'est ein' fos tous les mos qu'in l's inlièfe à Marly.
Y-in a plein les trottoirs et, quand l' camion i passe,
Du pus p'tit clo rouillé au pus gros mat'las d' lit,
Tout i-est débarrassé, tout c' qui s' vot i s' ramasse.
T'nez, un jour, Zéphyrin, qui s' prom'not à vélo,
Sint qué s' vessie réclame, au pus vite, un vidache.
I met donc pied à terre au "Café du Jav'lot"
Et, aussi fèl' qu'ein' balle, i s'inqueurt à l' bonn'
plache.
Bin soulagé, i r'vient et commante un grand d'mi.
I paie, bin seur, et sort', léger comme ein' pleumette.
Mais, du premier cop d'oeul, qu'est-c' qu'i vot, mes amis ?
In y-avot pris les roues dé s' bonn' viell' bicyclette !
A cinquant' mèt's, i-arpère un homm' qui s'en allot
Les roues in-d'ssous d' ses bras, comm' si ch'étot des ailes.
Mettant ses gamp's à s' cou Zéphyrin, aussitôt,
I rattrape el voleur, l'arrête et l'interpelle:
« Eh, pal' donc, compagnon, t'es vraimint
culotté!
Ej sais bin qué m' bécane ell' n'est pas d' ses pus neufe,
Mais quoi qu' ch'est qui t' permet dé v'nir el démonter
? »
L'aut', qui
n'étot sans dout' pas né dé l' dernièr' pleufe,
Répond: « L' vélo était contre un tas d'encombrants,
Entre un' machine à coudre, un' chaise, un bidon d'huile.
Je n'ai pas cru mal faire en vous débarrassant,
D'autant qu' j'en ai besoin pour dépanner ma fille.
- Jé n' démant' qu'à vous croir', dit not' zouaf',
mais, au moins, Pou vous fair' pardonner et comme el temps i presse,
L' moind' des choss's ch'est à ch't-heure ed vous print' par
el main Et d'aller m'armonter tout chà in grand' vitesse! »
L' bonhomme dit « ouais ! » pinsez : l'affair' s'arrinche
au mieux!
I r'tourn'nt vers el bistrot, tous les deux, quate à quate.
Mais, arrivés sur plache, is ouf'nt-té grands leus yeux:
L' camion des incombrants avot ramassé l' cate !
¥º¥º¥º¥
|
|
|